Çfarë është gastroskopia?

Gastroskopia është një procedurë diagnostikuese dhe terapeutike që përdoret për:

• Vlerësimin e dhimbjeve të stomakut.
• Urthin dhe refluksin gastroezofageal.
• Vështirësitë në gëlltitje.
• Të përzierat dhe të vjellat e përsëritura.
• Aneminë e pashpjeguar.
• Gjakderdhjet gastrointestinale.
• Dyshimet për ulçera, gastrit, tumore ose infeksion me helicobacter pylori.

Gjatë procedurës, mjeku mund të marrë edhe biopsi (mostra indore) për analiza të mëtejshme laboratorike.

---

Kur rekomandohet gastroskopia?

Gastroskopia rekomandohet kur pacienti paraqet:

• Djegie në kraharor ose urth të vazhdueshëm.
• Dhimbje epigastrike që nuk qetësohen me terapi.
• Vështirësi ose dhimbje gjatë gëlltitjes.
• Humbje peshe të pashpjeguar.
• Gjak në të vjella ose jashtëqitje.
• Anemi pa shkak të qartë.
• Dyshim për sëmundje të stomakut ose ezofagut.

---

Si kryhet procedura?

Gastroskopia kryhet në kushte të kontrolluara mjekësore dhe zgjat zakonisht nga 5 deri në 15 minuta. Gjatë kësaj procedure:

• Pacienti shtrihet në anën e majtë.
• Aplikohet anestezi lokale në fyt për të reduktuar refleksin e të vjellave.
• Në shumicën e rasteve, përdoret edhe sedacion i lehtë për rehati maksimale.
• Endoskopi futet nëpërmjet gojës dhe avancon drejt stomakut dhe duodenit.
• Mjeku vëzhgon mukozën dhe merr biopsi nëse është e nevojshme.

Procedura është përgjithësisht e padhembshme dhe tolerohet mirë nga shumica e pacientëve.

---

Si të përgatitemi për gastroskopinë?

Përgatitja e saktë është thelbësore për rezultate të sakta. Hapat që duhet të ndiqni janë:

• Mos hani ushqim për të paktën 6 orë para ekzaminimit.
• Mos pini lëngje për të paktën 4 orë para ekzaminimit.
• Informoni mjekun për çdo medikament që merrni.
• Antikoagulantët dhe disa barna të tjera mund të duhet të ndërpriten përkohësisht, por gjithmonë duke u konsultuar me mjekun përkatës.
• Nëse përdoret sedacion, duhet të shoqëroheni nga një person pas procedurës.

Në fund të procedurës ju do të merrni raportin e shkruar të gastroskopisë, si dhe një DVD me filmimin e rregistruar të saj. Mjeku do t’ju japë, gjithashtu, udhëzime të personalizuara në varësi të diagnozës dhe gjendjes suaj shëndetësore.

---

Çfarë ndodh pas procedurës?

Pas gastroskopisë:

• Mund të ndjeni mpirje të lehtë në fyt për 30 deri në 60 minuta.
• Mund të keni fryrje barku/stomaku ose gazra përkohësisht.

Nëse gastroskopia është kryer nën sedacion, ju duhet që për 12 deri në 24 orët e ardhshme të MOS:

• Ngisni automjet, motoçikletë ose biçikletë;
• Përdorni makineri të rrezikshme;
• Nënshkruani dokumente ligjore;
• Merrni vendime të rëndësishme;
• Konsumoni alkool;
• Merrni qetësues ose pilula gjumi (përveç rasteve kur janë të përshkruara nga mjeku).

Mbikëqyrja:

• Një i rritur përgjegjës duhet t’iu shoqërojë deri në shtëpi.
• Nuk duhet të jeni vetëm për të paktën 6 deri në 12 orë.

Ushqimi dhe pijet:

• Filloni me ujë sapo të jeni zgjuar plotësisht dhe të ndjeni fytin e çmpirë.
• Nëse nuk keni të përziera mund të konsumoni një vakt i lehtë pas 1–2 orësh.
• Shmangni ushqimet shumë të nxehta, pikante ose të rënda për të paktën 24 orë.

Aktiviteti:

• Pushoni për pjesën e mbetur të ditës.
• Aktiviteti normal zakonisht rifillon ditën pasardhëse.

---

A është gastroskopia e rrezikshme?

Gastroskopia është një procedurë shumë e sigurt. Komplikacionet janë të rralla, por gjithsesi të mundshme. Më të zakonshmet mund të përfshijnë:

• Gjakderdhje të lehtë pas biopsisë.
• Infeksion, në raste shumë të rralla.
• Perforim të murit të traktit tretës (jashtëzakonisht i rrallë – afërsisht 1 në 10'000 raste).
• Reaksione ndaj sedacionit.

Mjeku ju informon paraprakisht për çdo rrezik të mundshëm dhe merr masat maksimale për sigurinë tuaj.

---

Pyetje të shpeshta

A është gastroskopia e dhimbshme?

Jo. Procedura është zakonisht e parehatshme, por jo e dhimbshme. Sedacioni e bën atë shumë të tolerueshme.

Sa kohë zgjat?

Zakonisht nga 5 deri në 15 minuta, vetëm si procedurë. Por, duke llogaritur kohën e pritjes në klinikë, vizitën paraprake, ekzaminimet e tjera të mundshme (si p.sh. ekografi abdominale), analizat e mundshme laboratorike, dhe përgjigjen finale, ju duhet të llogarisni rreth 2 deri në 3 orë kohë të shpenzuar, nga momenti që hyni në klinikë deri në momentin që dilni.

Kur dalin rezultatet?

Rezultatet vizuale, raportet mjekësore, diagnoza përfundimtare jepen menjëherë. Përgjigjet e Biopsisë kërkojnë disa ditë.

Ku mund ta kryej gastroskopinë?

Gastroskopia kryhet në Klinika Kajo në Tiranë, pranë Pallatit të Sportit Asllan Rusi. Për më tepër informacion rreth lokacionit shikoni faqen e kontaktit.

A mund të shkoj në punë pas procedurës?

Nëse gastroskopia është kryer në sedacion, atëherë është mirë që ajo ditë të bëhet pushim. Pacientët që dalin nga procedura e sedacionit nuk duhet të ngasin automjete, të përdorin makineri të rrezikshme, të konsumojnë alkool ose të marrin vendime ligjore për 12 deri në 24 orët e ardhshme. Nëse gastroskopia është kryer pa sedacion dhe mjeku nuk ju ka rekomanduar të kundërtën, atëherë mund të vazhdoni punën normalisht.

---

Kush e kryen gastroskopinë në Klinika Kajo?

Gastroskopia kryhet nga gastroenterologët tanë me përvojë, duke përdorur pajisje moderne dhe protokolle të avancuara sigurie.

• Prof. Asc. Dr. Ilir Kajo
• Dr. Silva Gjika
• Dr. Atea Guma

---

Rezervoni gastroskopinë në Klinika Kajo

Nëse keni simptoma që kërkojnë vlerësim endoskopik ose dëshironi një kontroll parandalues, stafi ynë është gati t’ju ndihmojë.

Rezervoni gastrokopinë tani 👉

---

Rishikuar nga Prof. Asc. Dr. Ilir Kajo, Gastro-Hepatolog, Endoskopist, Klinika Kajo