Çfarë është EKG?

EKG-ja regjistron impulset elektrike që kontrollojnë rrahjet e zemrës. Regjistrimi zgjat vetëm disa sekonda dhe pasqyron aktivitetin e zemrës në një moment të vetëm kohor, ndërsa pacienti ndodhet në gjendje qetësie.

Ky ekzaminim shpesh përbën hapin e parë në vlerësimin kardiologjik dhe ndihmon mjekun të vendosë nëse nevojiten ekzaminime të mëtejshme.

---

Si kryhet EKG-ja?

Gjatë ekzaminimit:

• Pacienti qëndron i shtrirë dhe i qetë.
• Vendosen elektroda të vogla në kraharor, krahë dhe këmbë.
• Elektrodat lidhen me aparatin e ekg-së.

Aparati regjistron aktivitetin elektrik të zemrës për disa sekonda dhe krijon një grafik që interpretohet nga mjeku kardiolog.

---

Çfarë informacioni jep EKG-ja?

EKG-ja lejon vlerësimin e disa aspekteve themelore të aktivitetit elektrik të zemrës, duke përfshirë:

• Ritmin e zemrës, për të përcaktuar nëse rrahjet janë të rregullta apo të çrregullta dhe për të identifikuar aritmi të mundshme.
• Frekuencën e rrahjeve, që tregon sa herë rreh zemra në minutë dhe ndihmon në zbulimin e rrahjeve shumë të shpejta ose shumë të ngadalta.
• Përçueshmërinë elektrike, pra mënyrën se si impulset elektrike përhapen nëpër zemër, çka mund të tregojë blloqe ose vonesa në përçimin elektrik.
• Shenja të mundshme të ishemisë ose infarktit të kaluar, të cilat mund të reflektohen si ndryshime karakteristike në grafikun e EKG-së.

Duke qenë se regjistrimi zgjat vetëm disa sekonda, EKG-ja pasqyron aktivitetin e zemrës vetëm në momentin e ekzaminimit. Për këtë arsye, çrregullime që shfaqen herë pas here ose vetëm në kushte të caktuara mund të mos evidentohen në një EKG standarde dhe mund të kërkojnë ekzaminime shtesë për vlerësim më të plotë.

---

Ekzaminime të tjera për vlerësim të ritmit të zemrës

Në disa raste, për një vlerësim më të plotë, mjeku mund të rekomandojë:

Provë ushtrimore
Prova ushtrimore vlerëson të njëjtin aktivitet elektrik të zemrës, por në mënyrë të vazhdueshme gjatë aktivitetit fizik. Ajo ndihmon në identifikimin e çrregullimeve që shfaqen vetëm gjatë sforcimit.
👉 Mësoni më shumë për provën ushtrimore

Holter ritmi
Holter ritmi regjistron aktivitetin elektrik të zemrës në mënyrë të vazhdueshme gjatë jetës së përditshme, zakonisht për 24–48 orë, dhe në disa raste deri në 7 ditë. Ai është veçanërisht i dobishëm për zbulimin e aritmive episodike.
👉 Mësoni më shumë për holterin e ritmit

---

Fakt praktik 🩺

EKG-ja, prova ushtrimore dhe holteri i ritmit masin të njëjtin aktivitet elektrik të zemrës, por ndryshojnë në kohëzgjatje dhe kushte regjistrimi, duke plotësuar njëra-tjetrën në diagnostikë.

---

Sa kohë zgjat EKG-ja?

Vetë regjistrimi zgjat vetëm disa sekonda. Megjithatë, duke përfshirë përgatitjen, vendosjen e elektrodave dhe interpretimin e rezultateve, duhet të llogarisni reth 30 minuta kohë të shpenzuar në klinikë.

---

Pyetje të shpeshta

A është e dhimbshme EKG-ja?
Jo. EKG-ja nuk shkakton dhimbje. Pacienti mund të ndiejë vetëm kontaktin e lehtë të elektrodave me lëkurën.

A ka rrezatim EKG-ja?
Jo. EKG-ja nuk përdor rrezatim dhe konsiderohet plotësisht e sigurt, edhe për kontrolle të përsëritura.

A kërkon përgatitje EKG-ja?
Jo. Nuk kërkohet përgatitje e veçantë. Rekomandohet vetëm që pacienti të jetë i qetë gjatë ekzaminimit.

Kur i marr rezultatet?
Rezultatet interpretohen nga mjeku dhe zakonisht jepen menjëherë pas përfundimit të ekzaminimit.

Kur rekomandohet EKG-ja?
EKG-ja rekomandohet si pjesë e kontrolleve rutinë, në prani të simptomave si palpitacione, dhimbje gjoksi apo marrje mendsh, si dhe për monitorimin e sëmundjeve kardiake të njohura.

Ku kryhet EKG?
EKG kryhet në Klinika Kajo në Tiranë, pranë Pallatit të Sportit Asllan Rusi. Për më tepër informacion rreth lokacionit shikoni faqen e kontaktit.

---

Kush e kryen ekzaminimin në Klinika Kajo?

EKG-ja kryhet nga mjekë me përvojë, duke ndjekur protokolle standarde dhe duke përdorur pajisje moderne me teknologji të lartë.

• Prof. Dr. Efrosina Kajo

---

Rezervoni EKG në Klinika Kajo

Rezervoni elektrokardiogramën (EKG) në Klinika Kajo për një vlerësim të shpejtë dhe profesional të aktivitetit elektrik të zemrës suaj. 📅

Rezervoni tani👉

---

📌 Rishikuar nga Prof. Dr. Efrosina Kajo, Kardiologe, Klinika Kajo

KUJDES! Teksti në këtë faqe është shkurtuar dhe thjeshtësuar për t'u bërë më i kuptueshem nga pacienti mesatar. Ai ka si qëllim informimin e publikut dhe nuk duhet në asnjë mënyrë të zëvendësojë konsultat mjekësore të specializuara.